कोष र लक्ष्मी लघुवित्त वित्तिय संस्था बिच सम्झौता पत्रमा हस्ताक्षर ।

आज मिति २०७९ साल पौष महिनाको 17 गते आईतवारका दिन यस कोष र लक्ष्मी लघुवित्त वित्तीय संस्था लि., बीच लघुवित्त तथा विपन्न वर्ग कर्जासुरक्षण गर्ने सम्झौतापत्रमा हस्ताक्षर सम्पन्न भयो । सम्झौतापत्रमा कोषको तर्फबाट प्रमुख कार्यकारी अधिकृत श्री रमेश घिमिरे र लक्ष्मी लघुवित्त वित्तीय संस्था लि. को तर्फबाट प्रमुख कार्यकारी अधिकृत श्री प्रकाश राज शर्माले हस्ताक्षर गर्नु भएको थियो । कार्यक्रममा कोषका नायब प्रमुख कार्यकारी अधिकृत लगायत विभागीय प्रमुखहरु र लक्ष्मी लघुवित्त वित्तीय संस्था लि. का नायब प्रमुख कार्यकारी अधिकृत लगायत अधिकारीहरुको उपस्थिति रहेको थियो।  

      यस सम्झौतापत्रमा हस्ताक्षर भए सँगै लक्ष्मी लघुवित्त वित्तीय संस्था लि. ले लघु वित्त तथा विपन्न वर्ग कर्जा अन्तर्गत बिना धितो सामूहिक जमानीमा लगानी गर्ने प्रति व्यक्ति रु. दश लाखसम्म, शैक्षिक प्रमाणपत्र धितो जमानीमा लगानी गर्ने प्रति व्यक्ति रु.सात लाखसम्म, धितो जमानीमा लगानी गर्ने प्रति व्यक्ति रु. बीस लाखसम्म, वैदेशिक रोजगारबाट सीपमूलक तालिम लिई फर्केका युवा तथा दलित समुदायका व्यक्तिलाई सामूहिक जमानी वा परियोजना धितो अन्तर्गत लगानी गर्ने प्रति व्यक्ति रु. दश लाखसम्म र कोषको पूर्व सहमति लिई महिलाद्वारा सञ्चालित लघु उद्यम परियोजना अन्तर्गत परियोजना धितो राखी वा व्यक्तिगत वा सामूहिक जमानीमा लगानी गर्ने रु. पन्ध्र लाखसम्मको कर्जा कोषले सुरक्षण गर्नेछ।

यस प्रकार सुरक्षण हुने कर्जाको सुरक्षण शुल्क बार्षिक 0.8 प्रतिशत रहेकोमा ५० प्रतिशत नेपाल सरकारले अनुदान वापत व्यहोर्ने र बाँकी ५० प्रतिशत लक्ष्मी लघुवित्त वित्तीय संस्था लि. ले कोषमा बुझाउनेछ ।

कोषमा सुरक्षित कर्जा लिने ऋणीको मृत्यु भएमा वा प्राकृतिक प्रकोपबाट परियोजना नष्ट भएमा वा अन्य विभिन्न कारणबाट कर्जा असूली हुन नसकेमा संस्थाले दाबी गर्न सक्ने र उक्त दाबीमा कोषले 75 प्रतिशत भुक्तानी गर्नेछ ।